 |
| Mahalakshmi Geet |
सांजवेळी देवा पुढती लाविते मी सांजवात
सोनियाच्या पावलाने लक्ष्मी उभी दारात |
सुगंधाने वेडावतो अंगणात माझ्या मरवा
महालक्ष्मीने ल्याला शालू गार ग हिरवा |
पारिजातकाचा गंध माझ्या मना ग मोहवी
महालक्ष्मीच्या पायी सोनियांची ग जोडवी|
कोरांटीने ल्याला बघ नववधूचा तजेला
कटीवरी अंबेच्या ग घागऱ्यांची ही मेखला |
परसदारात पडला बकुळीचा बाई सडा
महालक्ष्मीने ल्याला हातात ग हिरवा चुडा |
कोरांटी ग दारातली अंगअंग फुलली दाट
लक्ष्मीला शोभला ग गोठ पाटल्यांचा थाट |
अष्टमीच्या स्वागताला गुलाब ग हासला
बाहू मध्ये लक्ष्मीच्या बाजूबंद ग शोभला |
आसामंत करतो धुंद बहरून ग हा चाफा
लक्ष्मीला शोभवितो सखे तन्मनी अन् लफा|
अबोली ही धरुनी फेर हसे आपुल्या मनात
वेल भोकरांचा साज अंबे तुझिया कानात|
रंगीबेरंगी फुलांचा फुलोनीया झाला रथ
महालक्ष्मीला शोभे हिऱ्यामानक्यांची नथ|
वसंताचे आगमन आम्रमंजिरी सांगते
जडावाचे मंगळसुत्र शोभा सर्वांची वाढते |
महालक्ष्मीच्या स्वागताला रेखियली मी रांगोळी
लावितेग हळदीकुंकू महालक्ष्मीच्या भाळी|
सांजवेळी देवा पुढती लाविते मी सांजवात
सोनियाच्या पावलाने लक्ष्मी उभी दारात |
Comments
Post a Comment